Neuseeland

Neuseeland - Kia Ora!

Am 24. Oktober simmer in Christchurch, Neuseeland glandet – ehrlichgseid mit sehr grosse Erwartige, will mer nur guets ghört hend über Neuseeland. 43 Täg, 6'606 Kilometer und 2 Insle spöter chani säge: Neuseeland isch unglaublich toll und so viilfältig. Sigs bi de Natur oder au bim Wätter. Gstartet ah de Küste bi Christchurch...fahrt mer 3 Stund und scho isch mer umgeh vo de neuseeländische Alpe. Mir hend würkli alles gseh; schöni Stränd, fantastischi Berglandschafte, Vulkän und geothermali Pärk, Rägewälder, grasgrüeni Hügellandschafte, aber au Wüeschtene mit riese Sanddüne, chlini ruhigi Dörfli, grossi Städt. S'Wätter hed verruckt gspiilt. Mir hend ih dene knapp 6 Wuche all Jahresziite erläbt. Über blüehendi Pflanze, ahgnehme Temperature, sehr chalte Nächt, Schnee, Gwitter, farbige Herbstwälder, tagelangem Räge, starche Windstürm aber au zwei, drü fascht scho heissi Täg, woni sogar ha chönne im Meer go bade.

Üse Roadtrip hemmer miteme Campervan gmacht. Mer fühlt sich so frei, will mer weiss, dass mer überall cha anegah und mer s'Bett und alles andere Wichtige immer debi. S' Bett hätt chönne bequemer sii, aber mer gwöhnt sich drah. De Van isch voll usgstattet gsi mit Mikrowelle, Küehlschrank, Abwäschbecki, Bsteck, Pfanne Camping-Tisch/-Stüehl etc. Es portabels WC hätts au gha, aber das hemmer nie brucht. Mir hend nur es paar anderi chlini Problemli gha mit üsem mobile Dehei. De Campervan hemmer mitere leere Gasfläsche übercho, obwohl eigentli en volli hätt sölle dinne sii. Das hemmer zum Glück früeh scho gmerkt und nomal schnell chönne zrugg zu de Abholstell fahre. Es paar Täg spöter hed sich de inere Kurve no d'Besteckschublade us de Verankerig glöst und isch usegheit. Bi glaub nonie so verschrocke, s'hed tönt als wäred all Fänschter glichziitig ihgschlage worde...Haha...D'Brämsschiibe sind au recht dure gsi und hends gar ned gern gha, wenn mer länger als 10 Minute hed müesse kurvigi Strasse durabfahre. Sie hend so grusig verbrännt gstunke und sind so heiss worde, dass es einisch sogar grüüchet hed. Nach 30 Minute abchüehle isch de Spuk denn verbi gsi. Und ich muess stolz säge; bi de mit de Ziit scho fascht en Profi worde mitem Abschätze vo de Kombination vom Schalte und Rollelah. S'isch en Automat gsi mit 3 niedrigere Gäng. Gäge Schluss bini so Streckene fascht nur no mit Hilf vo de Motorbräms durabgfahre...Yeeyy, kei heissi Brämsschiibe meh. Und au ganz toll: De Timo hed z'Nacht kochet und hed gmeint, dassr d'Pfanne no muess ihweiche lah. Hemmer au vorher scho es paar Mal gmacht, eifach dusse über d'Nacht anegleid und guet isch gsi. Aber ned ah dem Morge... er hed sie nämli vorders Hinterrad gleid gha... und chasch drü mal rate. Mir hend sie natürlich vergässe. S'strube isch; es isch ihm erscht es paar Täg spöter in Sinn cho & mer hend eus ned chönne vorstelle, wie mer das bim losfahre ned gmerkt hend...will ich zu 1000% drübertgfahre bi. Jänu cha halt passiere...mir sind aber gar ned truurig drübert gsi. Die Pfanne isch richtig scheisse gsi, hed kei Beschichtig gha & drum hed würkli ALLES immer drahkläbt und isch ahbrännt. Mir hend de für 12 Dollar en neui beschichteti Pfanne kauft & hed mega freud gha drah.


Freedom Camping

Früehner hed mer in Neuseeland überall chönne campe wo mer grad Luscht gha hed. Mittlerwiile hends leider einigi Regle müesse mache. S'gid immerno es paar, schöni und wengier schöni Plätz wo mer gratis döff übernachte im Campervan (aber nur wenn de Van „self-contained“ isch, dass heisst, wenn es WC vorhande isch, en Abwassertank etc.).


Schöfli, Schöfli und nomeh Schöfli. Aber wo sind d'Kiwi-Vögel?

Ned ohni Grund sind uf tuusige neuseeländische Souveniers Schöfli abdruckt. Das Neuseeland viil unbebauts Land hed, isch bekannt...und drum wirds au kei Saison geh, wo ned hunderti Schöfli uf Weide am grase sind. Chüeh heds zwar au viil gha, aber no lang ned so viil. Was mer leider ned z'Gsicht übercho hend sind d'Kiwis. Das liid aber drah, dass die nachtaktiv sind, tagsüber schlafed oder sich eifach verstecked. Es gäbt aber Uffangstatione, wo mer d'Kiwis vo nöchem cha erläbe.


Neuseeland isch rächt tüür...aber mehrheitlich immerno günstiger als ih de Schwiiz. Öppis wo sicher günstiger isch als ih de Schwiiz; Diesel. Und da simmer eigentli rächt froh gsi. Hend üse 70l Tank gfühlt jede zweite Tag wieder müesse fülle...das isch ah de lange Streckene gläge woni gfahre bi, aber au ah de Art vo de Strasse, wos dete hend. Fascht kei Autobahne, viil kurveriichi Streckene und teilwiis au kilometerlangi Chiies-Strecke. Es hed au immer wieder Momänt geh; wo mer eifach hend müesse säge; Wow... das gsehd us wie ih de Schwiiz. Und au wenns vllt viili ned glaubed. Neuseeland hed mer um einiges besser gfalle als das woni vo Australie gseh ha. Vo Neuseeland hemmer ächt viil gseh, aber gwüssni Streckene leider ned chönne fahre, wills überschwämmt gsi sind. Wer lieber Natur hed als Grossstädt, wird sich genau so schnell ih das Land verliebe.

Unser Camper-Van am Lake Pukaki

Nugget Point

Freedom-Camping am Lake Pukaki