Üses Australie-Abentüür isch verbi...

Nach 39 Täg in Australie chani säge; mir hend viil gseh...aber trotzdem erscht en ganz chline Teil vo dem riesige Land.

Mir sind am 16.09.2018 in Perth (Westküste) glandet und sind grad chli erstuunt gsi, wo mer d'Temperaturahzeig am Flughafe gseh hend. Es isch no früeh am Morge gsi und s'isch grad mal 3 Grad gsi. Scho en rächte Unterschied zu Japan...det hemmer nämli fascht täglich um die 30 Grad gha. Für zum ih de Stadt umezlaufe isch es z'früsch gsi, drum hemmer au ned eso viil unternoh. Es gid dete aber gratis CAT-Büs (Central Area Transit), wo dur die ganzi Stadt fahred. Das isch genial zum d'Stadt erkunde, ohni Geld uszgeh. Mir sind eifach mit allne 4 Linie einisch gfahre und mer cha ih- und usstiige wo mer will. Eine vo de Beschte Hält isch de Botanischni Garte „Kings Park“gsi. Das isch anschiinend eine vo de gröschte Stadtpärk vo de Wält. Sogar grösser als de mega berüehmti „Central Park“ in New York. Vom "Kings Park" obe hed mer en super Ussicht uf d'Skyline vo de Stadt gha. Mir hend de schnell mal usegfunde, dass es au schuscht ned würkli spannendi Sehenswürdigkeite in Perth gid. Drum ischs eigentlich perfekt gsi, dass mer scho vo Ahfang ah plant hend, dass mer en Tagesusflug uf Rottnest Island mached. Mir cha entweder direkt vom Hafe in Perth mitere Fähri uf d'Insle fahre... das wär denn die tüürer Variante. Oder mir fahrt mitem Zug uf Fremantle und denn vo det us mit de Fähri uf Rottnest Island... so hend miers gmacht. D'Insle isch „nur“ 11 Kilometer lang und 4.5 Kilometer breit und isch autofrei, zumindest gilted das für d'Touriste. D'Insle cha mer z'fuess erkunde, mitem Velo oder miteme Bus. Obwohl d' Sunne de ganz Tag gschunne hed, ischs relativ früsch gsi und mir hend eus für de Bus entschiide. De fahrt einisch um d'Insle mit de Hop-On/Hop-Off-Methode. Mir sind z'erscht einisch um die ganzi Insle gfahre und hend üs d'Ort gmerkt, wo mer bi de zweite Rundi denn wänd usstiige. S'hed würkli unglaublich schöni Stränd und s'wär sicher mega toll zum Bade und Schnorchle bi wärmerem Wätter. S'Highlight sind aber die herzige Quokkas gsi. Das sind chlini Tierli, verwandt mitem Känguru, wo nur uf dere Insle und ah ganz wenige Ort ah de Westküste vo Australie läbed. Sie sind mega zuetraulich und mir wür sie am liebschte knuddle. Leider döff mer sie ned ahlange/streichle. Wenn mer verwütscht wird müesst mer über 300 CHF Buess zahle. Aber en Usflug uf Rottnest Island döff mer sich echt ned entgah lah.

Nach dem churze Ufenthalt in Perth simmer uf Alice Springs gfloge und dete isch am nächschte Tag au scho üsi gfüehrti Outback-Tour losgange. Mir sind mitere Gruppe vo 12 Lüüt unterwägs gsi. S'erschte Ziel isch de Kata Tjuta Nationalpark gsi, mir sind zu de Kata Tjuta (übersetzt: Kata = Kopf, Tjuta = viele – viele Köpfe), das isch en Gruppe vo 36 Berge,hend det en chline Spaziergang gmacht und sind ahschliessend zum Uluru (Kononialname: Ayers Rock) gfahre und hend döffe en Sunneuntergangs-Apéro gnüsse. Ih de Nacht hemmer im Ayers Rock Camp gschlafe und am nächschte Tag simmer bim Uluru de Sunneufgang go beobachte. S'isch mega ihdrücklich gsi, wie de Sand vom Uluru richtig rot glüüchtet hed, wo d'Sunne drufgschune hed. Ahschliessend hemmer üs uf de Wäg gmacht zum Fuess vom Uluru. Vorher hemmer ihn nur us de Ferni gseh. Bim Ayers Rock ahcho, simmer de Base-Walk gloffe und zum Abschluss hemmer no en chlini Tour, gfüehrt vonere Aboriginie (Australischi Urihwohnerin) gmacht. Dete hemmer meh über d'Gschicht vo de Uriwohner, und vom Uluru, aber au viiles über d' Aboriginal-Kunst glernt. Am letschte Tag vo de Tour simmer zum Kings Canyon gfahre, wo mer denn de Kings Canyon Rim Walk gmacht hend. De isch genial gsi, zum Ahfang zwar rächt ahsträngend, will mer innert churzer Ziit viil Höhemeter muess mache. Aber nachher dobe cha mer sehr gmüetlichlaufe und d'Landschaft und d'Ussichte sind grossartig. De Abstiig isch wieder sehr steil und mir isch denn doch froh, wenn mer heil dunne ahchunnd. Und de ischs leider au scho wieder zrugg uf Alice Springs gange. Am nächschte Tag isch üsi Reis scho wiitergange uf Cairns ad Ostküste. D'Stadt isch relativ wiit im Norde. Nach es paar entspannte Täg inere Airbnb-Wohnig in Cairns, hemmer am 26.09.2018 üses Mietauto abgholt und üse Roadtrip gstartet. Mir hend no gar kei Plän gha, was mir alles wänd gseh und wo mir als erschts hiigönd. S'einzige wo mer gwüsst hend, isch, dass mir am 23.09.2018 in Sydney s'Auto wieder müend abgeh. Uf direktem Wäg vo Cairns uf Sydney wäred das 2500 Kilometer und en 26 Stunde Autofahrt. Mir hend eus entschiide, dass mer z'erscht no chli nördlich fahred, will det obe de bekannti Daintree Rägewald isch. Die erschte paar Kilometer und Stunde uf de Strass sind rächt usefordernd gsi. In Australie fahreds im Linksverkehr. Usserdem bini nonie vorher es „grosses“ Auto gfahre und nonie en Automat. Ah die letschtere zwei Sache hani mi schnell gwöhnt. Bim Linksverkehr bruchts echli länger zum sich drahgwöhne. Aber solang mer sich guet konzentriert cha mer au das ohni Problem meischtere.

Im gsamte bini exakt 3'290 Kilometer gfahre und das isch d'Route vo eusem 28-tägige Roadtrip gsi:

01. Tag - Port Douglas

Sehenswürdigkeiten/Aktivitäten:

St. Mary's by The Sea Chapel, Four Mile Beach, Trinity Bay Lookout

02. Tag - Daintree Rainforest / Mission Beach

Sehenswürdigkeiten/Aktivitäten:

Daintree Rainforest – Mossman Gorge mit Bademöglichkeit im Fluss

03. Tag - Mission Beach

Sehenswürdigkeiten/Aktivitäten:

Strand

04. Tag - Townsville

Sehenswürdigkeiten/Aktivitäten:

Streetart-Tour, River Walk

05. Tag - Magnetic Island

Sehenswürdigkeiten/Aktivitäten:

Koala Village, Schnorcheln Geoffry Bay, Horseshoe Bay Market

06. Tag - Airlie Beach

Sehenswürdigkeiten/Aktivitäten:

Ausgangspunkt für Whitsundays, Cruise Whitsundays Camira Sailing Tour

07. Tag - Airlie Beach

08. Tag - Rockhampton

Sehenswürdigkeiten/Aktivitäten:

Botanischer Garten, City Walk

09. Tag - Rockhampton

10. Tag - Agnes Water

Sehenswürdigkeiten/Aktivitäten:

Strand, Sonnenuntergang in 1770

11. Tag - Hervey Bay

Sehenswürdigkeiten/Aktivitäten:

Whale Watching mit der Pacific Whale Foundation

12. Tag - Hervey Bay

13. Tag - Brisbane

Sehenswürdigkeiten/Aktivitäten:

City Walk, Gratis-Fähre, Mount Coot-tha Lookout

14. Tag - Brisbane

15. Tag - Surfers Paradise

Sehenswürdigkeiten/Aktivitäten:

Strand

16. Tag - Byron Bay

Sehenswürdigkeiten/Aktivitäten:

City Walk, Strand, Coastal Walk, Leuchtturm

17. Tag - Byron Bay

18. Tag - Coffs Harbour

Sehenswürdigkeiten/Aktivitäten:

Look At Me Now Headland, Hafen-Markt am Samstag

19. Tag - Port Macquarie

Sehenswürdigkeiten/Aktivitäten: Strand, Coastal Walk, Leuchtturm

20. Tag - Port Macquarie

21. Tag - Newcastle

Sehenswürdigkeiten/Aktivitäten:

Hafen, Fort Scratchley, Newcastle Breakwall

22. Tag - Newcastle

23. Tag - Bondi Beach

Sehenswürdigkeiten/Aktivitäten:

Bondi Beach, Tamarama Beach, Sculpture by the Sea, Coastal Walk

24. Tag - Bondi Beach

25. Tag - Bondi Beach

26. Tag - Sydney

Sehenswürdigkeiten/Aktivitäten:

Darling Harbour, China Town, Opernhaus, Harbour Brücke, The Rocks, Hyde Park, Powerhouse Museum, Botanischer Garten

27. Tag - Sydney

28. Tag - Sydney

Top: Mir hend so viil gseh, s'isch ächt schwer zum säge, was mir am beschte gfalle hed...spontan würi aber säge: Quokkas, Outback-Tour, Whale Watching, Kängurus in freier Wildbahn, Tieruffangstation uf Magnetic Island und s'Schnorchle bi de Whitsunday-Insle.

Flop: Eigentli erscht ih de letschte zwei Wuche heds einiges geh, wo mir gar ned passt hed. In Newcastle hemmer zwei Nächt im ne Hostel gschlafe, wo Bettwanze gha hed. Leider merkt mer d'Biss vo dene Scheiss-Viecher erscht eis bis zwei Täg spöter. Mini ganze Arme, Händ, Bei und Füess sind voller Biss gsi, wo meh als en Wuche so abartig fescht bisse hend. Öppis anders negativs, wo mir grad no ihfallt: Mitem Auto uf Bondi bzw. ad Bondi Beach... de Horror! Es isch nonig mal richtig Badewätter gsi, aber s'hed eifach kei Parkplätz. Das stimmt zwar ned ganz: es HED Parkplätz. Aber uf de meischte döffsch nur ei oder zwei Stund gratis parkiere oder zahlsch 8 Dollar ih de Stund. Es gid nur ganz wenigi Zone ih dere Gägend, wo mer gratis und ziitlich unbegränzt cha parkiere. Aber ich glaub da cha sich jede vorstelle, dass die natürli immer schön bstetzt sind. Mir hend für 3 Nächt es Hostel buecht gha, wo gseid hed, dass sie gratis Parkplätz hend. Das hed aber ned gstumme, sie hend eifach gwüsst, wo die Zone sind, wo mer beliebig lang döff parkiere. Aber das bringt ja au nüd, wenn die alli andere au kenned. Mir sind also dete ahcho und hend die erschte paar Stund all zwei Stund müesse go umparkiere. Irgendwenn nach de 22:00h hemmer eus de mal uf d'Suechi gmacht nacheme unbegränzte Parkplatz. S'hed sich also glohnt... nach paar Minute umenandfahre, hemmer de eine gfunde... S'isch ned grad ih de Nöchi vom Hostel gsi. Aber d'Hauptsach isch gsi, dass mer nümme müend umparkiere und/oder Unmänge ah Geld usgeh. S'Auto hemmer denn dete stahglah und sind die nächschte paar Täg z'fuess unterwägs gsi. Jetzt isch mer grad no öppis anders in Sinn cho: Mir hend au allg. echli Päch gha mitem Wätter. S'hed relativ viil grägnet und drum hemmer au einigi Ort/Sehenswürdigkeite eifach usglah, wills ih dem Wätter kei Spass gmacht hätted. Aber halb so wild. Ja das wärs au scho fascht gsi; zu unglaublich dräckige Hostel-Chuchene und zahlriiche tote Kängurus am Strasseränd muessi glaub ned viil meh säge. Zwar... zu de Kängurus gids no schnell öppis z'verzelle:

Australie ohni es (lebändigs) Känguru gseh z'ha?

So viil Kilometer simmer gfahre..so viil Kängurus hemmer gseh... leider alles überfahrni,toti am Strasserand. Mir hend d'Hoffnig würkli scho fascht ufgeh...hend ned denkt, dass mer no lebändigi Kängurus werdet gseh. Ich ha ned welle in en Zoo...ich wett ned ihgsperrti Kängurus gseh, wo täglich vo hunderte Lüüt gstreichlet werdet. Leider hemmer üs chli z'wenig früeh erkundet, wo's freiläbendi Kängurus gid, Mir hend de nämli gmerkt, dass mer ah eim Ort scho es paar Täg vorher verbi gfahre sind. Per Zuefall hani denn aber irgendwo unterwägs mitübercho, dass es am „Look At Me Now Headland“ ih de Nöchi vo Coffs Harbour viil Kängurus sött geh. S'isch denn en sehr rägnerische Tag gsi und mir hend ahgno, dass sich d'Kängurus sicher verstecked. Mir sind aber trotzdem losgfahre und siehe da.... au bi Räge fühled sich d'Kängurus pudelwohl dusse. S'hed soo viil Kängurus gha, sogar söttigi wo no jungi Babys im Büütel gha hend.

Viil hemmer gseh und erläbt und irgendwenn gaht das Australie-Abentüür villicht wiiter...will s'gid no so viil anders zum Entdecke.