Hallöchen! So wie's usgseht, hesch mini Website gfunde. Herzlich Willkomme!

De Start vo somne Ihtrag isch gar ned so eifach wie ich denkt ha. Ich ha mir no überhaupt kei Gedanke gmacht, ob ich mini Biiträg uf Schwiizerdütsch oder uf Hochdütsch söll schriibe. Zimmli sicher wirdi bi Schwiizerdütsch bliibe, will ich's denn genau so cha ufschriibe, wienis dir wür verzelle, wenn näb mir würsch sitze.

Scho immer hani gseid, dassi irgendwenn mal wett go reise. Sit ich Geld verdiene, hani monatlich immer en chline Betrag uf d'Siite tah. Und jetzt isch's endlich sowiit! Dank em ahgsparte Geld und minere mega tolle Arbetsgeberin, hani d'Möglichkeit und d'Ziit für 8 Mönet go reise. S'isch überhaupt ned selbstverständlich, dass mer die Chance döff ha und drum bini umso glücklicher, dassi mir de Traum döff verwürkliche.

Uf minere Website findsch unter anderem die grobi Reise-Route, mini To-Do's vor de Reis, mini Pack-Liste, mini Usgabe und wiiteri Infos, wo dir villicht au chönnted hälfe, wenn mal ah dem Punkt stahsch, wo dini eigeti (Welt-)Reis döffsch plane. De Blog dient an erschter Stell als Tagebuech für mich. Aber ha natürli au mega Freud drah, wenni DIR vo mine Erläbnis und Erfahrige cha verzelle. Im beschte Fall chömmed während mim Reisli laufend neui Ihträg und Bilder dezue. Verspräche chani aber nüd; ich wirde zimmli sicher au ah Ort sii, woni kei Internet wird ha und drum weissi ned, wie oft ich d'Chance ha de Blog z'aktualisiere. Mer werdets gseh, wenns sowiit isch.

Im nächschte Ihtrag wirdi dir verzelle, was mini erschte Schritt gsi sind, nachdem ich erfahre ha, dass min unbezahlti Urlaub definitiv bewilligt worde isch.

8 Mönet unbezahlte Urlaub. Welli Länder wämmer ih dere Ziit überhaupt bereise?

Ja, ich rede vo „mer“ und wird’s au in Zuekuft öfters mache. Die Meischte, wo wüssed, dass de Blog existiert, wüssed au, dass ich ned ellei loszieh, sondern dass mich min Fründ wird begleite.

Zur Inspiration hemmer eus bi de Globetrotter Reisekatalög bestellt. Ih dene gfindet mer Infos über die einzelne Länder, Klimatabelle bzw. Tabelle mit de beschte Reiseziite, Hotel-Empfählige, Tour-Empfählige und viiles meh. D' Katalög cha mer übrigens au online ahluege oder direkt bi de Globetrotter-Filiale go hole.

Warum Globetrotter? Ich ha scho viel Positivs ghört gha vo Lüüt us mim Umchreis, wo bereits ihri Erfahrige gmacht hend mit Globetrotter. Au wenni für d’Buechig vo „normale“ Ferie ned viil vo Reisebüros halte, isch mir ih dem Fall eigentli vo Ahfang ah klar gsi, dass mir eus für die langi Reis professionell berate lah wänd. Mittlerwiile chani au vo mine persönliche Erfahrige säge, dassi s'Globetrotter-Reisebüro wärmschtens cha wiiterempfähle.

Nachdem die diverse Katalög ihtroffe sind. Hemmer en ganze Sunntig-Namittag demit verbracht die Reisekatalög durezblättere und üs Länder und Städt ufgschriibe, wo mer gern würet bereise. S'isch, wie erwartet, en mega langi Liste worde. Am liebschte wett mer ja so viil wie möglich gseh. Trotzdem sött mer ned vergässe, dass ned all Länder so chli sind wie d'Schwiiz und mer im ne andere Land düütlich länger brucht zum vo A nach B z'cho. Demit mer konstant immer ih ei Richtig chönnd flüge, hemmer eus müesse entscheide ih wellere Reihefolg mir d’Länder bereise wänd. Mir hend eus dur jensti Klimatabelle kämpft und so vorzue Destinatione usgschlosse, wills eifach vo de Flugroute her, in Kombination mitem Klima vor Ort, ned ideal gsi wäred. Aber üs isch natürli klar gsi, dass mier au viel Länder und Städt wieder werdet vo eusere Lischte neh, wills ziitlich und budgetmässig ned dinne ligged. Irgendwenn simmer de sowiit gsi sind, dass mer folgendi Flugroute plant gha hend: Japan, Australie, Neuseeland und Süd-/Zentralamerika.

Nachdem mer für üs de Plan gmacht hend, hemmer denn mit de Globetrotter-Filiale in Zug en Beratigstermin abgmacht. In erschter Linie ischs üs mal wichtig gsi z’ghöre, ob üse Plan und üses Budget realistisch sind. Mir hend denn üsere Reiseleiterin alles verzellt, sie hed eus no es paar Tipps geh zu de Klimazone ih de verschiidene Länder und wie viil Ziit mir mindischtens ih dene Länder verbringe sötted. Sie hed eus gnau zueglost gha und hed üsi Wünsch notiert. Viil Frage hemmer eigentli gar ned gha, will mer viiles scho im Vorus recherchiert gha hend. Mer hend üs nomal erkundigt, wies usgseht mit de verschiidene Visas und mitem Around The World-Flugticket. Es paar Täg spöter hemmer de en Offerte übercho. Sie hed eus ih allne Ahflug-Städt es Hotel offeriert gha...und das isch s'einzige gsi, wo mer schlussendli no gänderet hend. Mir hend entschiide, dass mer Airbnb-Wohnige werdet neh, will die um einiges günstiger sind. Und öppe en Wuche spöter ischs de sowiit gsi & mir hend die ahpassti Offerte ahgno und d'Reis definitiv buechet.