New York - Die Stadt, die niemals schläft.

12.06.2019

Das stimmt also würklich…egal was für en Tagesziit oder was für Wätter…s’isch immer öppis los gsi.

 

 

New York isch die letschti Destination vo eusere Reis gsi. Eher unfreiwillig eigentlich. Will mer es «Around the World» Flugticket buechet hend, hemmer müesse über d’USA id Schwiiz zrugg. Ab Mexiko hätts kei Fluggsellschafte geh, wo bi dem ATW-Ticket inbegriffe gsi wäred. Hend eus denn für New York entschiide gha…und das hed mer uf de ganze Reis immer wieder chli z’dänke geh. Mir sind lang ih günstige Länder unterwägs gsi...und wo mer eus de ahfah erkunde hend, was die Hostels in New York so choschted...phuuu unglaublich tüür! Aber alles wieder umbueche hätt irgendwie au kei Sinn meh gmacht. Drum hemmers eifach so durezoge, wie mers vo Ahfang ah buechet hend.

 

S’hed mi ehrlichgseid ned so gflasht. Es isch definitiv cool, die Stadt mal z’erläbe. Mer seid ja au: In New York gids nüd, wo mer ned cha mache. Das trifft glaub scho zue. Mer chönnt sich z’Tod shoppe. S’gid tuusigi verschideni Läde. Aber das hed mi ned interessiert gha. Wasi aber genial gfunde ha, isch d’Uswahl am Ässe. S’gid so unglaublich viil Restaurants. Die Qual der Wahl! Was mer au sehr guet gfalle hed isch s’9/11-Museum. Ich bi erscht 5i gsi, wo de Ahschlag verüebt worde isch…mag’ mich no so guet ah de Tag erinnere als wärs geschter gsi. Ih de Jahr denah hani immer wieder Dokumentatione über de Ahschlag gluegt. Und denn gids au no all die Verschwörigstheorie, wo eifach so viil Sinn ergänd. Weiss jetzt nonig, was ich söll glaube. Aber muess säge, bi nonie ih somne spannende Museum gsi. Mer muess sich würklich guet Zyyt neh, wenn mer alles will gseh. Sehr ihdrücklich und s’hed mi rächt berüehrt. En Spaziergang im Central Park sött mer sicher au mache, wenn mer in New York isch. De Park selber isch ned sehr speziell. Es isch eifach faszinierend, wie schnell mer vergisst, dass mer inere Grossstadt isch. Nur wenn mer ufeluegt, gsehd mer, dass rundume Hochhüüser stönd. Es Highlight isch de Bsuech ih de öffentliche Bibliothek am Bryant Park gsi. Ganz en spezielli Atmosphäre im ne wunderschöne Gebäude, miteme coole Souvenier-Shop dinne!

 

Was mich erstuunt hed: Ich bi doch scho ih einige Städt U-Bahn gfahre. Aber s’Subway-System in New York findi chli doof bzw. unpraktisch. Es isch dinne z.B. ned so guet ahgschriibe wie in London. Mer muess bi de Ihgäng vo de Statione immer luege, obs Up- oder Downtown fahred. Es gid sälte Ihgäng wo mer zu Statione chunnd, wo denn Züg ih beidi Richtige fahred. Das heisst, mer muess immer z’erscht de richtig Subway-Ihgang go sueche. Mer gwöhnt sich drah... Übrigens: Es Subway-Ticket lohnt sich sehr! Mir hend für 34 USD es Wucheticket glöst. Mer isch einiges schneller und vorallem viil günstiger unterwägs als miteme Taxi oder mit Uber. Will mer ned die ganze 7 Täg vom Subway-Ticket brucht hend, hemmer scho vor de Abreis gseid, dass mer s’Ticket verschänke wänd. Aber mir hend de usegfunde, dass mer mit dem Ticket sogar bis an Flughafe chömmed und denn gar nümme drahdenkt...bis mer usem Airtrain usgstiige sind und üs det eine abgfange hed und gfrögt hed, ob er üsi Tickets döff. Mir hend sie ihm natürlich geh. Wo mer ihm gseid hend, dass es sogar no ganzi zwei Täg gültig isch, hed er sich würklich mega gfreut gha. Und mir eus natürlich au, dass mer nomal öpperem hend chönne en Freund mache am letschte Tag vo eusere Reis.

 

New York isch de perfekti Abschluss gsi vo eusere Reis. Für all wo sowieso grad ih de USA oder det umenand sind, chani die Stadt sicher empfähle. Aber nur für en Städtereis vo de Schwiiz uf New York flüge...für das lohnt sichs, minere Meinig nah, ned.

 

 

Bildergalerie New York

 

Share on Facebook
Please reload

Aktuelli Ihträg:

18.08.2018

12.08.2018

Please reload

Hallo, schön bisch da!

Ich bin d'Noemi, bin 23i und wohne ih de wunderschöne Zentralschwiiz.

Vom September 2018 bis Ändi April 2019 bini chli ih de Wältgschicht "umegfüdlet".

Ih dere Zyyt hani Teil vo folgende Länder bereist: Japan, Australie, Neuseeland, Peru, Bolivie, Ecuador, Kolumbie und Mexiko.

Und debi no Zwüschehalt gmacht ih zwei Metropole, wo unterschiidlicher ned sii chönnted; Buenos Aires und New York.

 

Es sind es paar Blogihträg entstande, woni chli über d'Länder verzelle. Usserdem gfindsch au hunderti Föteli und es paar Infos zum Vorbereite, Packe etc.

 

Falls zu irgendöppisem no meh Infos wetsch, döffsch mich gern kontaktiere.

Gib' dir gern Tipps zu Sehenswürdigkeite oder hilf' dir bi de Planig vonere Reise-Route :-)

About Me

© 2019, noemianza.com