Mexiko - Que chido!

21.04.2019

Hallihallooo us Mexikooo. 25 Täg hemmer da verbracht... 25 Täg mit viil Sunne, viil Meer und viil entspannte Stunde. Genau das hemmer au vorgha! Eifach nomal chli de Summer gnüsse und chli „Ferie“ mache bevors denn is eher hektische New York und ahschliessend hei, zrugg in Arbetsalltag, gaht.

 

S'gid ned eso viil z'berichte. Mir sind vo Bogota, Kolumbie uf Cancún, Mexiko gfloge. Det hemmer denn z'erscht es paar Täg im ne Hostel im Zentrum verbracht. Ah eim Tag hemmer en Usflug zu de Maya-Stadt Chichén-Itzá gmacht. Ahschliessend hemmer no döffe inere Cenote go bade und d'Stadt Valladolid bsuecht. S'isch en seeeehr lange Tag gsi. Scho de ganzi Usflug selber isch über 15h gange.

 

 

Es paar Täg spöter simmer denn uf d'Isla Mujeres. En wunderschöni Insle nur es paar Kilometer vor de Küste vo Cancún. Vorallem de Strand „Playa Norte“ am nördliche Ändi vo de Insle isch genial. Kristallklars Wasser... au 200m vom Ufer entfernt. Uf de Insle gids au einiges z'gseh...aber mir hend würkli nur no welle am Strand umehänge und eifach nüd mache. Hend z'erscht nur zwei Nächt ihplant gha und denn aber scho am erschte Tag entschiide, dass mer sicher länger werdet bliibe.

 

 

Mir sind denn 4 Täg bliibe... und denn hemmer eus uf de Wäg gmacht uf Playa del Carmen...das isch leider en Enttüschig gsi. D'Stadt selber isch sooo touristisch... s'isch eifach nümme ahgnehm. Go Bade hemmer au ned chönne, wills grad mega Problem hend mit Alge. S'werdet täglich tonnewiis Alge an Strand gspüehlt und es stinkt au dementsprechend. Mir hend zum Glück en Pool gha im Hostel :-). Trotzdem simmer gar ned truurig gsi, wo mer nach üsne buechte 4 Nächt wieder hend müesse uschegge. Im Gägeteil... hend eus mega gfreut, will mer eus spontan entschiide hend, nomal uf d'Isla Mujeres z'gah. Im Bus ufem Wäg uf Cancún isch denn öppis passiert, wo mer ghofft hend, dass es nie wird passiere. Am Timo sini Buuchtäsche isch klaut worde. Aber ich muess au säge... es isch sin Fehler gsi. Er hed s'Täschli ah sim chline Rucksack ahgmacht und unter sim Sitz verstaut...ha ihm scho uf jedere Busfahrt gseid, dassr das ned sött mache. D'Buchtäsche sött mer immer am Körper ha und de Rucksack chunnd höchschtens an Bode bi de Füess VOR em Sitz. So hanis immer gmacht und nie Problem oder Angst gha, dass irgendöppis chönnt klaut werde. Tja... so en Wixxer, hed denn halt sini Chance usgnutzt. S'isch en Ihheimische gsi...und er isch es paar Stopps vor eus usgstiige. In Cancún hed de Timo denn gmerkt, dass öppis fehlt. Geld weg, Kreditkarte weg, chlini Souveniers und Gschänkli weg... aber ZUM GLÜCK ned sin Pass. De isch nämli ih minere Täsche gsi! No am Busterminal hed er chönne sini Kreditkarte sperre lah... aber s'isch scho z'spat gsi...ih de Zwüscheziit hed de Typ scho über 800 Franke abghobe. Kei Plan wie mer das gnau schafft ohni de Pin-Code. Aber anschiinend ischs irgendwie möglich. 

 

De Pass isch ja no ume gsi und drum hed eus au nüd ufghalte wiiterzreise...wieder zrugg uf d'Isla Mujeres. Und das hend sich würklich glohnt. Hend det nomal fascht 5 Täg verbracht, d'Sunne, de Strand und s'suubere!! Meer gnosse. Nach dene Täg simmer nomal uf Cancún is Hostel im Zentrum. 

 

Vor es paar Täg simmer uf Mexiko City gfloge... will mer vo da us uf New York flüged. Mir hend versuecht de Flug umzbueche, dass mer direkt vo Cancún uf New York chönnted flüge. Aber die Umbuechig wär sooo tüür cho, dass sichs eifach ned glohnt hätt. Aber ned eso tragisch, s'hed eifach mega viil Lüüt überall, will grad s'Osterwuchenend isch und all frei hend. S'Wätter isch au genial. Drum hemmer geschter en Walking Tour dur d'Stadt gmacht und so viil gseh und viiles glernt über Mexiko.

 

 

Bildergalerie Mexiko

 

 

Share on Facebook
Please reload

Aktuelli Ihträg:

18.08.2018

12.08.2018

Please reload

Hallo, schön bisch da!

Ich bin d'Noemi, bin 23i und wohne ih de wunderschöne Zentralschwiiz.

Vom September 2018 bis Ändi April 2019 bini chli ih de Wältgschicht "umegfüdlet".

Ih dere Zyyt hani Teil vo folgende Länder bereist: Japan, Australie, Neuseeland, Peru, Bolivie, Ecuador, Kolumbie und Mexiko.

Und debi no Zwüschehalt gmacht ih zwei Metropole, wo unterschiidlicher ned sii chönnted; Buenos Aires und New York.

 

Es sind es paar Blogihträg entstande, woni chli über d'Länder verzelle. Usserdem gfindsch au hunderti Föteli und es paar Infos zum Vorbereite, Packe etc.

 

Falls zu irgendöppisem no meh Infos wetsch, döffsch mich gern kontaktiere.

Gib' dir gern Tipps zu Sehenswürdigkeite oder hilf' dir bi de Planig vonere Reise-Route :-)

About Me

© 2019, noemianza.com